Навивачите ширум светот во четврток покренаа петиција со која бараат Џани Инфантино да се повлече од функцијата претседател на ФИФА. Човекот број еден во светскиот фудбал се соочува со сè поголем број неистомисленици од почетокот на Светското првенство. Овој пат, навивачите го кренаа својот глас и против него со заедничката порака „InfantinoOut“ и бараат целосна обнова на ФИФА.
„Срамниот обид од едно лице, самиот претседател, да го продаде Светското првенство на приватни инвеститори целосно разоткри предавство што фудбалот никогаш нема да го заборави“, се наведува во петицијата.
Борбата против Инфантино ја покрена европска и африканска навивачка група, Независниот совет на северноамерикански навивачи и околу 40 национални навивачки групи ширум светот.
Инфантино имаше план според кој ќе продаде 20 проценти од комерцијалните права на Светското првенство на приватни инвеститори, и поради ова, како и поради претходните дејствија во организацијата, Инфантино ја изгуби довербата на европските и азиските фудбалски организации, како и на централноамериканските и северноамериканските фудбалски организации.
