Селекторот на норвешката фудбалска репрезентација, Столе Солбакен, изјави дека тимот ќе му помогне на напаѓачот Ерлинг Халанд да одигра повеќе натпревари на Светското првенство за да може да постигнува повеќе голови, додавајќи дека играчот на Манчестер Сити е „во пламен“.
„Денес пропушти отворена можност, а можеше да постигне дури и четири гола. Мислам, тој е најдобриот напаѓач, не игра за Франција или Аргентина, туку постигнува голови за Норвешка. Сега има четири гола, два на најголемата сцена“, рече Солбакен по натпреварот против Сенегал, објави Скај.
Фудбалската репрезентација на Норвешка се пласираше во осминафиналето на Светското првенство, откако го победи Сенегал со 3-2 во Њујорк, во второто коло од Групата I.
Норвешка поведе во 43-тата минута со голот на Маркус Педерсен и двата гола на Халанд, во 48-тата и 58-мата минута. Напаѓачот на Манчестер Сити досега постигна четири гола на турнирот во САД, Канада и Мексико.
„Полесно е да се освои Златната копачка кога играш за Франција или Аргентина, но ние ќе се обидеме да му дадеме на Ерлинг повеќе натпревари и поголема помош во претстојните натпревари. Тој е „во пламен“ и многу сум среќен што може да постигнува голови на најголемата сцена“, рече Солбакен.
По две кола, најдобар стрелец на Светското првенство во САД, Канада и Мексико е Аргентинецот Лионел Меси со пет гола, додека Французинот Килијан Мбапе и Халанд имаат по четири гола.
Франција вчера го победи Ирак со 3-0 во таа група со два гола на Мбапе и се пласираше во осминафиналето. Норвешка и Франција ќе играат за првото место во Група I на 26 јуни.
„Сè уште не сме почнале да планираме (Франција), ќе се вратиме во нашиот камп за добро да се одмориме бидејќи ни е потребно по многу тежок натпревар, а ќе има и други играчи кои ќе играат во тој натпревар“, рече тренерот.
Халанд ја даде прогнозата за турнирот.
„Не ми е гајле, поминавме понатаму – тие (Франција) веројатно ќе нè победат и ќе го освојат турнирот“, рече Халанд.
