Кошаркарскиот репрезентативец на Македонија, Андреј Јакимовски беше претставен како ново засилување на Наполи Баскет заедно со Џамиус Ремзи и Џеф Даутин Џуниор.
Јакимовски на прес-конференцијата изјави дека немал сомнежи во изборот на овој проект.
„Го познавам Наполи, играв тука минатата година и знам дека е страсно место со една од најдобрите навивачки бази во Италија. Имаме длабок и талентиран состав, со многу одлични играчи. Можеме да оставиме трага во првенството и во Еврокупот. Минатата година играв во Европа и знам дека физичкото ниво на играта многу ќе се зголеми. Тренерот (Јасмин) Репеша беше една од причините што ме натераа да ја прифатам понудата на Наполи. Тоа е важен проект и се надеваме дека ќе ги постигнеме нашите цели.“, порача тој.
Јакимовски оптимистички коментираше за групата на тимот од Неапол во Еврокупот, нарекувајќи ја конкурентна и полна со противници од највисоко ниво. И покрај тешкотиите, целта е висока: да се заврши меѓу првите четири и да се обезбеди место во плејофот.
„Минатата година веќе се соочив со три или четири екипи; ги познавам. Сите екипи се од највисоко ниво. Оваа година, Еврокупот направи уште еден чекор напред. Вистина е дека има некои навистина силни екипи, но ние изградивме комплетен тим. Секако ќе биде тешка група, не лесна, но мислам дека можеме да завршиме меѓу првите четири и да се пласираме во плејофот“, истакна репрезентативецот на Македонија.
