РК Вардар 1961 импресивно го доби првото големо македонско ракометно дерби сезонава против Еурофарм Пелистер и ја продолжи својата победничка серија во домашното првенство. Актуелниот шампион му го нанесе првиот пораз сезонава на својот најголем ривал во деветтото коло од Супер лигата, а по натпреварот, тренерот на домашниот тим Иван Чупиќ ги сподели своите ставови за дербито.
Чупиќ нагласи дека неговиот тим „никому не му ја дава улогата на фаворит во нашата сала“.
„Секогаш сме фаворити дома. Така се позициониравме во првенството и во Лигата на шампионите. Не се плашиме од таа улога, бидејќи добро знам, а моите играчи ми веруваат, колку е тешко да се игра во нашата сала. Не смееме да ја отстапиме улогата на фаворит на никого. Дербито е секогаш тешко, полно со тензии и емоции. Во првото полувреме беше јасно дека ни треба малку повеќе време за да ја достигнеме нашата натпреварувачка температура. Имавме водство од три гола, но во второто полувреме видов подобра одбрана, фокус и транзиција. Заслужено освоивме два бода и игравме до крај без стрес или нервоза.“
Хрватскиот стручњак нагласи дека квалитетот на неговиот тим дошол до израз во остатокот од натпреварот.
„Кога ги гледам играчите пред натпреварот, јас сум полн со оптимизам, но никогаш не се стававме себеси како да сме над некого. Знаевме дека противникот ќе падне ако играме добра игра и фокусирана одбрана. Нашиот квалитет дојде до израз. Сега, без разлика дали реална разликата од седум, девет или 12 гола, не е важно. Важно е што покажавме дека сакаме да ја одбраниме титулата и дека сме на вистинското ниво на наш терен. Сакам да продолжам со истата скромност и мотивација. Мора да имаме ист пристап против секој противник.“
Чупиќ особено зборуваше за атмосферата и поддршката од навивачите, но и за разочарувањето од елиминирањето од Лигата на шампионите.
„Атмосферата беше одлична. Имавме тежок месец, можеби сакавме некои луди работи, а тоа беше да ја поминеме групата во Лигата на шампионите. Бевме тажни за навивачите, бидејќи имавме одлична атмосфера во три натпревари, но не успеавме да им се оддолжиме. Се надевам дека ќе ни простат по оваа победа. Енергијата и поддршката ни значат многу. Сакам кога мојот тим живее со публиката. Спортот е емоција и секој мора да доживее вакви моменти во својата кариера“, рече Чупиќ.
