Српскиот кошаркарски тренер Жељко Обрадовиќ денес беше официјално претставен во Атина како нов главен тренер на Панатинаикос. Пред неговата промоција, Обрадовиќ беше пречекан на прес-конференција од илјадници навивачи кои го поздравија со аплауз и скандирања на неговото име.
Потоа, обраќајќи се пред бројни медиумски екипи, тој изрази длабока благодарност за можноста да се врати во Атина, истакнувајќи дека преговорите поминале сосема непречено.
„Пред се, сакам да му се заблагодарам на (сопственикот на тимот) Димитрис Јанакопулос што ми даде можност повторно да бидам тука. Навистина го ценам ова“, рече 66-годишниот Обрадовиќ на почетокот.
„Беше многу пријатен разговор и беше многу лесно да се договориме. Никогаш не ја изгубив врската со семејството Јанакопулос, ниту со луѓето тука. Исто така и со овие навивачи, кои беа одлични за тоа што ме примија назад“, додаде тој.
Обрадовиќ потпиша тригодишен договор со Панатинаикос.
Претходно тој го водеше грчкиот клуб 13 години, од 1999 до 2012 година, освојувајќи вкупно 16 трофеи.
„Ако имате мотивација, можете да правите што сакате. Истото важи и за поставување голема цел. Имам оган во мене да продолжам да бидам тренер. Ми беше многу лесно да ја најдам таа мотивација тука, на ова место“, рече Обрадовиќ, кој беше петкратен европски шампион со атинскиот тим.
Обрадовиќ призна дека споредбите помеѓу минатото и сегашноста ќе бидат неизбежни.
„Да, не можам да избегам од тоа. Кој сака да спореди што било порано со она што е сега, има право да го стори тоа. Запомнете, пред две минути реков дека минатото е добро, но мора да се живее во сегашноста, а уште повеќе во иднината“, рече Обрадовиќ.
„Најважно е да се работи како семејство и да се разбираме едни со други со голема почит. Тоа е секогаш клучот за секој тим и секој клуб. Бидејќи тимот и тој клуб се на прво место“, додаде тој.
Новиот тренер на Панатинаикос, исто така, нагласи дека сите успеси од неговиот прв мандат биле можни благодарение на единството во самата организација.
„Сè што постигнавме тука беше затоа што работевме заедно, како семејство. А сега мора да работиме на ист начин. Каде ќе нè однесе, како ќе изгледа, којзнае. Ветувам само она што секогаш го ветувам, а тоа е дека ќе бидам тука, целосно посветен на овој клуб и на мојата работа затоа што ја сакам“, рече Обрадовиќ.
Обрадовиќ откри дека не се занимавал кошарка поголемиот дел од времето откако го напушти Партизан во ноември.
„Можеби пред 20 дена, мојот прв контакт со кошарката по ноември беше во Италија, кога мојот поранешен играч Џиџи Датоме ме покани да одржам кошаркарски час таму. И отидов и работев со некои деца таму. Моментот кога стапнав на теренот по ноември беше нешто посебно за мене“, рече Обрадовиќ.
„Чувството што го имам кога сум на теренот е нешто што ме движи, а потоа сум најсреќниот човек на светот. Затоа се надевам и сум сигурен дека ќе го имам ова чувство секој пат кога ќе излезам на теренот и ќе имам можност да работам со моите играчи. И оттука сè започнува“, заклучи тој.
