Британската Би-Би-Си објави статија во која се наведува дека новите правила за погонските единици би можеле да донесат поедноставни, поевтини и полесни хибридни V8 турбо единици, во кои моторот со внатрешно согорување би имал предност во однос на електричната енергија.
Според првиот нацрт на предлогот на ФИА, новата генерација мотори би можела да биде воведена во 2030 или 2031 година, со цел намалување на трошоците, олеснување на автомобилите и зголемување на важноста на возачките вештини.
Сегашните автомобили на Формула 1 користат 1,6-литарски V6 турбо хибридни мотори, додека новиот предлог предвидува враќање на V8 конфигурација со работна зафатнина од 2,0 до 2,3 литри. Планот вклучува помал турбополнач, поедноставен хибриден систем и вкупна моќност од околу 900 КС, при што моторот со внатрешно согорување ја обезбедува поголемиот дел од моќноста. V8 моторот последен пат беше виден во сезоната 2013, исто така хибриден систем, а работниот волумен беше 2,4 литри.
Според предложениот концепт, моќноста на електричниот систем би се намалила на 200 kW, во споредба со сегашните 350 kW. Од нив, 100 kW би биле достапни за редовна употреба, додека дополнителни 100 kW би се користеле за функцијата „push-to-pass“, односно привремено зголемување на моќноста за полесно престигнување.
Една од главните цели на новите правила е да се намали вкупната маса на автомобилите за 80 килограми, што треба да придонесе за нивно подобро управување и респонзивност. ФИА, исто така, предлага да се намали ограничувањето на буџетот за развој на мотори за 50 проценти, во споредба со сегашната годишна граница од 190 милиони долари, што би ги намалило трошоците за производителите и би им го олеснило влегувањето на новите компании во спортот.
Новите мотори треба да ги задржат турбополначите, за разлика од првичните предлози за враќање на атмосферските мотори, бидејќи турбо технологијата овозможува поголема ефикасност и подобра поврзаност со развојот на патните автомобили. Планот, исто така, вклучува употреба на целосно одржливи горива, а воедно ги поедноставува техничките барања за намалување на нивните трошоци за производство.
Промените доаѓаат по критиките од возачите за сложеноста на сегашните погонски склопови и големото влијание на електричниот систем врз возењето. Фернандо Алонсо ја опиша сегашната Формула 1 како „светско првенство на батерии“, додека Макс Верстапен претходно ги нарече новите правила „Формула Е на стероиди“, критикувајќи го начинот на кој управувањето со енергијата влијае на трките.
Иако основниот концепт на предлогот е прифатен во принцип од производителите, деталите сè уште не се конечно договорени. Според ФИА, дискусиите во текот на наредните недели треба да доведат до предлог што би бил презентиран на Светскиот совет на ФИА во декември, по што би се донела одлука за следните чекори.
