Селекторот на Бразил, Карло Анчелоти остави можност Нејмар да се најде во составот од 26 играчи за Светското првенство оваа година, велејќи дека напаѓачот има два месеци да докаже дека ги има потребните квалитети.
Трофејниот тренер тврдеше дека асот на Сантос би бил во конкуренција доколку е целосно подготвен, но го изостави од составот за пријателските натпревари против Франција и Хрватска.
Во нова изјава, Италијанецот нагласи дека Нејмар е на вистинскиот пат, но дека сè уште има два месеци да се докаже пред Светското првенство, кое се одржува од 11 јуни до 19 јули во Северна Америка и Мексико.
„Тој е голем талент и нормално е луѓето да мислат дека може да ни помогне да го освоиме следното Светско првенство. Моментално го оценува Федерацијата, јас го правам тоа, и сè уште има два месеци да покаже дека има квалитет за да игра на Светското првенство. По повредата на коленото, Нејмар тргна во вистинската насока, постигнувајќи голови. Мора да продолжи во оваа насока и да ја подобри својата физичка подготвеност. Тој е на вистинскиот пат“, рече Анчелоти.
Најдобриот стрелец на сите времиња во Бразил со 79 гола не играл за националниот тим од сериозната повреда на коленото во октомври 2023 година и се мачи со конзистентност откако се врати во Сантос минатата година.
Поразот на Кариоките од Франција со 2-1 во Бостон ги натера навивачите да го скандираат името на Нејмар, но Анчелоти ги отфрли „сугестиите“ во тоа време, велејќи дека фокусот треба да биде на одбраните играчи.
За потсетување, „Селесао“ беа извлечени во Групата Ц на Светското првенство со Мароко, Хаити и Шкотска.
