Шпанската фудбалска федерација ги одложи сите натпревари закажани за вторник поради трагичната смрт на 30-годишниот играч на Тенерифе, Хесус де Мигел.
Станува збор за натпреварите од Купот во машка и женска конкуренција, а дуелот помеѓу шпанската и јапонската младинска репрезентација исто така нема да се одигра.
„По смртта на Хесус де Мигел, играч на Тенерифе, во знак на почит и солидарност, Федерацијата одлучи да ги одложи натпреварите закажани за вторник, 3 ноември. Големото шпанско фудбалско семејство е обединето во тага за оваа загуба и им ја испраќа целата своја љубов и поддршка на семејството, пријателите и најблиските на Хесус де Мигел“, објави, меѓу другото, Шпанската фудбалска федерација.
Де Мигел почина денеска како резултат на сериозен судир што се случи еден ден претходно на натпревар од втората лига помеѓу Тенерифе и Андора.
Противничкиот голман го удрил Де Мигел силно во градите со коленото, по што 30-годишниот напаѓач останал неподвижен на теренот.
По добивањето на помош на теренот, Де Мигел беше префрлен во амбулантно возило, каде што доживеа срцев застој на пат кон болницата.
Лекарите веднаш започнаа со реанимација, и иако шпанските медиуми објавија во текот на ноќта дека фудбалерот е во стабилна состојба и свесен, неговата здравствена состојба се влоши и, за жал, тој почина.
