Во Шпанија, логично е што ремито без голови на „Ла Фурија“ со дебитантот Капе Верде во првиот натпревар од Светското првенство во 2026 година не беше добро прифатен. Локалниот печат не ги штедеше критиките кон селекторот Луис де ла Фуенте и ѕвездите на тимот.
„Катастрофален почеток“, пишува во насловот на „Марка“. „Ненадејна катастрофа ја погоди Шпанија во Атланта. Непознат тим, лишен од фудбал, идеи и ресурси, сепак Шпанија се најде во неможност да постигне гол против Капe Верде, ентузијастичен тим кој го приреди големото изненадување на ова Светско првенство. Доцниот потег за вклучување на Ламин Јамал и Нико Вилијамс во потрагата по триумф не даде резултати.
Атланта стана сцена на спортско чудо, како аматер од локалната теретана да го победил најдобриот Рафа Надал. Шпанија го стави Капе Верде на фудбалската мапа. Колосалното разочарување од дебито, сепак, може да се поправи во соблекувалната. Дебито на Шпанија беше со нетрпение очекувано откако тимот се сметаше за фаворит за освојување на титулата на турнир кој е лавиринт во кој често се губи сигурноста. Тука се вклопува и Де ла Фуенте, кој како да го изгуби компасот при правењето на замените. Тоа беше сликата на натпреварот за Шпанија – тим без компас“, додава Марка.
„Разочарувачки почеток за Шпанија на Светското првенство“, се вели во статија во Мундо Депортиво. „Шпанскиот план пропадна од самиот почеток. Тимот играше со бавно темпо, со предвидливо движење на топката и малку одлуки против добро организиран, смирен и многу дисциплиниран противник. Гави, позициониран како крилен напаѓач, имаше мало влијание, а Педри не успеа да ја наметне својата вообичаена контрола на средниот ред.“
