Селекторот на Саудиска Арабија, Јоргос Донис, изјави дека нерешениот резултат на неговиот тим против Уругвај во првиот натпревар од Групата Х на Светското првенство е позитивен.
Тој исто така рече дека ограниченото време што го имал со тимот не му дозволило да изгради подобра тактичка флексибилност во репрезентацијата, што би им помогнало на Азијците уште подобро да се справат со искусниот јужноамерикански тим. Грчкиот стручњак го замени Ерв Ренард на крајот на април, а против Уругвај денес го имаше своето официјално деби, откако ја водеше селекцијата на Саудиска Арабија само во три контролни натпревари пред Светското првенство во 2026 година.
„Работевме заедно само три недели, во кои се обидуваме да го изградиме нашиот стил на игра, тактичка поставеност и да го подигнеме моралот на тимот. Затоа, бод против тим како Уругвај е позитивен резултат и ќе ја зголеми нашата самодоверба. Сè уште се обидувам да го разберам мојот тим, подобро да ги запознаам играчите, нивните силни и слаби страни. Гледам како реагираат и како се однесуваат во одредени ситуации, но сум свесен дека поради недоволното време поминато заедно, сè уште не ја развиле флексибилноста што е неопходна за време на натпреварите.
Можеме да играме во шеми 4-4-2 или 4-3-2-1, но мора да можеме да преминеме и на формација со тројца играчи од средниот ред или тројца во одбраната, што е неопходно. Во моментов, за жал, тоа не е случај. Ја немаме оваа тактичка варијабилност. Ни треба повеќе време да ја изградиме“, коментираше Донис, цитиран од Ројтерс.
Саудијците го отворија резултатот кратко пред паузата, а во второто полувреме беа принудени главно да се бранат и примија израмнувачки гол десет минути пред крајот.
„Во првото полувреме добро ја контролиравме играта, имавме неколку шанси за гол, иако не беа многу јасни. Успеавме да поведеме и во второто полувреме беше јасно дека ќе мора да се браниме повеќе, бидејќи имавме водство, а противникот мораше да ги бара своите шанси во нападот. Нашата цел беше да го заштитиме нашето водство, но не успеавме.
По паузата, нашиот интензитет се изгуби, можеби играчите малку се заморија кон крајот. Го примивме противникот премногу длабоко во нашата половина и бевме казнети. Не покажавме доволно самодоверба, не ја задржавме топката добро за да го скршиме нивното темпо. Ова му овозможи на Уругвај да нè притисне пред нашиот шеснаесетник. За среќа, имавме одличен голман и прилично солидна одбрана и тоа ни помогна“, додаде Донис.
