Поранешната ѕвезда на UFC, Марк Хант, се најде во центарот на голем скандал откако беше уапсен во Австралија под обвинение за семејно насилство и упатување смртни закани кон жена.
Според локалните медиуми, легендарниот тешкаш, познат како „Супер Самоанец“, бил уапсен во вторникот вечерта во североисточниот дел на Нов Јужен Велс.
Веднаш следниот ден бил изведен на суд, каде што се соочил со обвиненија за вознемирување и заплашување со намера да се предизвика физичка повреда. За време на сослушувањето било наведено дека испраќал и заканувачки пораки.
Хант (52) бил уапсен во својот дом и ја поминал ноќта во притвор во полициската станица Балина. Иако првично му била одбиена кауција, подоцна бил ослободен под строги услови. Му било наредено да живее на адреса во предградието на Сиднеј и да нема контакт со оштетената страна.
Судењето е закажано да продолжи на 30 април, кога се очекуваат повеќе детали за случајот, кој привлече големо внимание од јавноста.
Кон крајот на 2022 година, Марк Хант ја водеше последната борба во својата кариера. Во боксерски меч, тој го нокаутира Сони Бил Вилијамс во четвртата рунда.
