Документацијата поврзана со неуспешниот план на претседателот на ФИФА, Џани Инфантино, да продаде удел во своите натпреварувања на приватни инвеститори ќе им биде достапна на членовите на советот на организацијата, објавија денес британските медиуми.
Минатиот месец, Европската фудбалска централа (УЕФА) ѝ даде рок на светската фудбалска организација до 2 ноември да објави детали за контроверзниот предлог наречен ФИФА Форвард Ентерпрајз (FFE) и да одговори на низа прашања за процесот на управување и донесување одлуки на организацијата.
Ова следеше по состанокот на советот на кој Инфантино се извини откако се откажа од планот за продажба на акции. Тој не објасни како дошол до предлогот, но побара прашањата да бидат доставени писмено.
Само неколку часа пред рокот поставен од европското фудбалско тело, генералниот секретар на ФИФА, Матијас Графстром, испрати писмо до членовите на нејзиното главно тело за донесување одлуки, наведувајќи дека под одредени услови ќе можат да ги разгледаат документите, и тоа само лично, во седиштето на организацијата во Цирих, објави Би-Би-Си.
Тој рече дека одлуката е донесена за да се исполнат обврските за доверливост, а од членовите на Советот е побарано да го регистрираат својот интерес за увид во документите во следните две недели.
Не е познато точно кои документи ќе бидат достапни.
BBC Sport дознава дека ФИФА го сметала рокот од две недели даден од УЕФА за одговор на повеќе од 100 прашања за нереален, со оглед на тоа што неодамна беше фокусирана на организирање на Светското младинско првенство во Азербејџан и подготовка за вонреден конгрес што ќе се одржи подоцна овој месец.
Изворите, исто така, рекоа дека можноста на ФИФА да одговори на некои прашања е ограничена со судските постапки што ги започна УЕФА во Соединетите Држави во октомври, кога побара пристап до докази и документи, предупредувајќи дека може да поднесе кривични пријави во Швајцарија.
УЕФА минатиот месец соопшти дека ФИФА не одговорила на голем број клучни прашања.
Писмото содржело осум страници прашања што опфаќаат теми почнувајќи од проектот FFE и финансирањето на националните фудбалски асоцијации до доделувањето на првата награда за мир на ФИФА на американскиот претседател Доналд Трамп, како и контроверзната условна суспензија на американскиот репрезентативец Фоларин Балогун од Светското првенство.
Управното тело на европскиот фудбал не прецизираше какви чекори планира да преземе доколку ФИФА не го исполни рокот, но се надеваше дека ќе го зголеми притисокот врз Инфантино пред крајниот рок на 18 ноември, што е рокот до кој потенцијалните кандидати мора да потврдат дека ќе го предизвикаат Инфантино на претседателските избори следната година.
