Австралискиот фудбалер Кристијан Волпато беше позитивен на кокаин откако беше запрен од полицијата поради пребрзо возење во Сиднеј.
Дваесет и две годишниот играч од средниот ред на Сасуоло возел БМВ преку мостот „Анзак“ нешто по еден часот во ноќта кога, а полицијата, според извештаите, го евидентирала дека управувал со брзина од 109 километри на час. Ограничувањето на брзината на тој дел е 60 километри на час.
Откако го запреле, полицајците го подложиле на прелиминарен тест за дрога, а резултатот бил позитивен на кокаин. Тие, исто така, зеле втор примерок од неговата плунка, кој бил испратен на дополнителна лабораториска анализа. Истрагата за тоа сè уште не е завршена, а првичниот резултат од тестот сè уште не е потврден. Досега, против Волпато не се поднесени кривични пријави поврзани со наводното консумирање дрога.
Тој беше казнет за пребрзо возење, а неговата меѓународна возачка дозвола беше суспендирана шест месеци, што значи дека не му е дозволено да вози во австралиската држава Нов Јужен Велс во тој период.
Полицијата тврди дека Волпато бил запрен само неколку часа претходно, околу 23 часот, во истата област. Исто така, наводно возел побрзо од дозволената брзина и му е изречена казна за пребрзо возење.
Во таа прилика, тој бил подложен на алкотест, кој покажал дека не бил под дејство на алкохол. И покрај првото запирање и казната, полицијата повторно го фатила како пребрзо вози два часа подоцна.
Волпато е роден во Сиднеј, но играл за Италија во јуниорските репрезентации. Само неколку месеци пред Светското првенство, тој одлучи да ја смени репрезентацијата и да го прифати повикот за Австралија.
Тој одигра три настапи за Австралија на неодамна завршеното Светско првенство. На клупско ниво, тој игра за Сасуоло, а пред тоа, беше член на Рома, во чиј дрес дебитираше во италијанското првенство.
Случајот би можел да го привлече вниманието и на австралиските фудбалски власти, но важно е да се направи разлика помеѓу тестирањето на сообраќајната полиција и спортските антидопинг процедури. Можните спортски последици не можат да се утврдат само врз основа на прелиминарен тест спроведен покрај патот.
Фудбалската асоцијација на Австралија сè уште не дала официјална изјава за инцидентот.
