Германија не славеше на крајот од натпреварувањето во Групата Е, но Јулијан Нагелсман нема да дозволи поразот од 1-2 од Еквадор негативно да влијае на тимот пред првиот натпревар во нокаут фазата, со Парагвај во Фоксборо.
„Панцирите“ ќе влезат во натпреварот од шеснаесетфиналето без повредените Ленарт Карл и Ник Шлотербек, но кој и да истрча на теренот ќе мора да покаже многу повеќе отколку што беше случај во претходниот натпревар.
Нагелсман го окарактеризира настапот против Еквадор како „тактичко самоубиство“ по раното водство, а против Парагвај, уште еден тим од Јужна Америка, може да има многу слични работи, кога станува збор за играта на противникот.
Она што е поголем проблем за Германците е вкрстувањето со големи противници во нокаут фазата на турнирот. Како први во групата, добија можност да одат на Парагвај, но очигледно е дека во осминафиналето би можеле да се сретнат можеби со првиот фаворит на турнирот, Франција. Дури и да беа втори, на позицијата на Брегот на Слоновата Коска, во осминафиналето веројатно ќе одеа на Бразил, па практично немаа премногу мобилност.
Нагелсман не е заинтересиран за овие пресметки, тој вели дека единствено важно е да се победи, без разлика кој е на другата страна.
„Кога станува збор за германскиот тим, сè е за победа на секој натпревар. Истото важи и за овој натпревар против Парагвај. За да ги исполните очекувањата, треба да имате самодоверба, добар план, за играчите да се чувствуваат удобно на теренот и да имаат шанса да ги прават вистинските работи. И да покажат колку се добри и на крајот да победат. Во фудбалот, сè е во победата. Ако победите на натпревар, сè е совршено, ако изгубите, сè е сра*е. Значи, мора да победиме“, јасен е поранешниот тренер на Баерн.
Тој додава дека е задоволен од она што го видел на тренинзите овие денови.
„Ни треба совршен настап. Кога го гледав тренингот, бев многу среќен, можам да ви кажам дека сум убеден дека момците ќе го одиграат својот најдобар можен натпревар“
И покрај импресивниот настап на Дениз Ундав како играч од клупата, со три гола и две асистенции во првите два натпревари, Нагелсман ќе се држи до својата одлука Каи Хаверц да го започне натпреварот и да го предводи нападот.
Напаѓачот на Арсенал немаше можност да игра за Германците во нокаут фазите на големите турнири, а „панцирите“ завршија во групната фаза во претходните два случаи. Сепак, Хаверц е некој што постигнал голови во финалињата на Лигата на шампионите за своите клубови (Челси и Арсенал) и е одличен кога станува збор за натпревари од ваков калибар.
„Во основа, јас сум играч кој сака големи предизвици. Не знам зошто е така, но се чувствувам многу удобно. Се надевам дека ќе ја продолжам оваа добра серија на големи натпревари и на Светското првенство“, рече Хаверц.
Соработката со Флоријан Вирц и Џамал Мусијалa би можела да биде подобра, а Хаверц вели дека тие работат подобро заедно од натпревар во натпревар.
„Многу сме блиску до тоа високо ниво, кога зборуваме за тоа што може да се подобри, а што може да се промени. Навистина сакаме да го покажеме нашиот целосен потенцијал, тројцата знаеме како ќе го направиме тоа. Убедени сме во победата против Парагвај, тројцата игравме фудбал на највисоко ниво и веруваме во нашите способности“, оптимист е Хаверц.
