Лестер Сити и BC Game меѓусебно ја раскинаа соработката, објави клубот, откако обложувалницата ја ангажираше руската порно актерка Ева Елфи како амбасадор.
Клубот во соопштението соопшти дека по дискусиите во последните денови, се појавиле различни комерцијални приоритети за иднината. Лестер му се заблагодари на BC Game за две и пол години соработка. Според истиот извор, договорот требало да трае до крајот на сезоната 2026/27.
Ангажманот на Ева Елфи предизвика критики од навивачите. „Фоксис Траст“, навивачка организација, оцени дека клубот ги напуштил своите вредности, предупредувајќи дека коцкањето и порнографијата можат сериозно да влијаат на животите на луѓето, особено на младите.
Навивачите кои купиле дрес со логото на BC Game преку официјални канали во последните 28 дена можат да го вратат за целосно враќање на парите или замена до 2 декември. Ова важи за носени и персонализирани дресови.
Патем, BC Game е регистриран во Белизе и нема лиценца за работа во Велика Британија.


