Селекторот на Белгија, Руди Гарсија, беше многу разочаран по елиминацијата на тимот од Светското првенство. „Црвените ѓаволи“ го загубија четвртфиналниот натпревар против Шпанија со 1-2.
„Би рекол дека ги погледнавме Шпанците во очи. Тоа беше важно за духот на тимот. Вечерва бевме поразени затоа што многу работи беа против нас. Кога ќе го изгубите вашиот капитен и вашиот голман, кој е еден од најдобрите во светот, и кога треба да го замените Де Бруин, станува многу тешко. Судбината не беше на наша страна. За да стигнете далеку, ви треба среќа. Но, горд сум на нашите играчи и на нашите перформанси. Си заминуваме со кренати глави“, рече Руди Гарсија.
„Можевме дури и да постигнеме втор гол. Ја гледав снимката и Мајкл Оливер (судијата – н.з.) можеби не ја виде, но тоа играње со рака на Родри беше пенал за нас во 60-тата минута. Тогаш можевме да поведеме со 2-1. Нема да зборувам повеќе за таа ситуација, но тоа беше и удар на судбината. И ако имате премногу такви, станува тешко да се продолжи напред“, нагласи белгискиот тренер.
„Ќе учиме од овој пораз. Знам дека секој детаљ е важен, го знам тоа од искуство. Не можете да правите грешки, не можете да давате подароци. Во текот на целиот натпревар губевме топки што понекогаш беа премногу лесни. Сите стоиме еден зад друг, но во иднина не смееме да правиме такви грешки“, призна стручњакот.
На прашањето дали ќе го обнови договорот како селектор на репрезентацијата, кој истекува по Светското првенство во 2026 година, Гарсија одговори: „Сега не е време да зборуваме за тоа“.
