Англискиот напаѓач Хари Кејн чувствува дека е во најдобрата форма во својата кариера и е решен да ја продолжи својата импресивна серија на голови во текот на оваа исклучителна сезона за него. Тој стана херој за „Трите лава“ откако два доцни гола донесоа пресврт од 0-1 на 2-1 против ДР Конго. Победата го квалификуваше тимот на Томас Тухел за осминафиналето на Светското првенство, каде што ќе се соочат со еден од домаќините – Мексико.
„Оваа сезона беше совршена за мене. Досега имам 72 гола и се надевам дека ќе додадам уште неколку. Мислам дека е речиси 20 повеќе од мојата најдобра досега, a имав неколку прилично добри сезони“, рече 32-годишниот напаѓач во подкастот „Lion’s Den“.
„Имав свои моменти, но во однос на тоа како се чувствувам во моментов, мислам дека генерално се чувствувам добро на теренот како што сум се чувствувал досега“, додаде тој.
Пред да се приклучи на англиската репрезентација на Светското првенство, Кејн одигра клучна улога за Баерн Минхен, помагајќи им да ја задржат титулата во Бундеслигата и да го освојат Купот на Германија, постигнувајќи 61 гол.
„Без разлика на ситуацијата или шансата што ја добивам, чувствувам дека можам да постигнам гол. Мислам дека е само прашање на време. За да стигнете до големите турнири ви треба малку среќа за да бидете во врвна форма, што не е секогаш лесно по тешка сезона. Оваа година беше убава од таа перспектива. За мене сè е во следниот натпревар. Јас сум во добра форма. Само сакам следниот натпревар да дојде и добро е што натпреварите доаѓаат брзо“, рече Кејн.
Неговиот соиграч Ентони Гордон, кој асистираше за двата негови гола против ДР Конго, го опиша како најголемиот играч што некогаш го носел дресот на Англија.
„Оваа сезона само Меси го надмина“, рече Гордон. „Лионел Меси е најголемиот на сите времиња. Тој е единствен од ваков вид, а Хари е веднаш зад него. Не може да има поголем комплимент од тоа. Она што го направи оваа сезона е нешто што никогаш порано не е видено, ниту еден англиски играч не го направил тоа. Тој е неверојатен, неговата конзистентност секој ден, неговата способност да шутира од секој агол е најдобрата што некогаш сум ја видел. Мислам дека како нација веројатно треба да го цениме многу повеќе бидејќи тој е најдобриот што некогаш го носел дресот на Англија.“
