Манчестер Сити го освои Карабао Купот откако го победи Арсенал со 2-0 во финалето во недела на Вембли. Тимот на Пеп Гвардиола му ја одзеде шансата на Арсенал да го освои својот прв трофеј од 2020 година. Сити поведе во 60-тата минута кога Нико О’Рајли ја искористи грешката на голманот на Арсенал, Кепа Аризабалага. Само четири минути подоцна, англискиот репрезентативец го постигна својот втор гол, со глава по центаршутот на Матеус Нуњес за резултат од 2-0.
„Не се обложив ниту една фунта за победа денес“, им рече воодушевениот Гвардиола на новинарите по натпреварот. „Не можевме да го победиме Нотингем Форест дома или Вест Хем на гости, загубивме со вкупен резултат 5-1 против Мадрид. Но, играчите повторно докажаа – старите и особено новите – дека кога ќе се побара од нас, ние сме способни да играме на највисоко ниво. Бев особено импресиониран од нашата изведба во второто полувреме, беше неверојатно добра.“
За време на интервјуто за медиумите по финалето, Гвардиола именуваше три тима за кои смета дека се моментално најдобри во Европа. Според него, тоа се Арсенал, и покрај поразот во финалето, и неговите два поранешни клуба – Баерн Минхен и Барселона.
Интересно е што сите три тима што Гвардиола ги истакна минатата недела обезбедија место во четвртфиналето на Лигата на шампионите. Арсенал го елиминираше Баер Леверкузен со вкупен резултат 3-1, Баерн ја декласираше Аталанта со 10-2, додека Барселона беше убедлива против Њукасл Јунајтед со вкупен резултат 8-3.
Гвардиола не го вклучи актуелниот европски шампион, Пари Сен Жермен, кој го елиминираше Челси со вкупен резултат 8-2 во осминафиналето на Лигата на шампионите. Тој го изостави и Реал Мадрид, клубот што неодамна го елиминираше неговиот Манчестер Сити со вкупен резултат 5-1, иако треба да се напомене дека Сити играше со еден играч на почетокот на реваншот на „Етихад“ поради црвениот картон на Бернардо Силва.
По триумфот во купот, Гвардиола и неговите играчи сега се свртуваат кон Премиер лигата и нивниот обид да го стигнат Арсенал. Иако „топџиите“ на Микел Артета остануваат фаворити, победа на Сити на „Вембли“ сигурно ќе ја направи трката за титулата уште поинтересна по паузата со репрезентативните натпревари.
