Селекторот на Катар, Хулен Лопетеги, беше скршен откако загуби со 6-0 од Канада во нивниот втор натпревар од Групата А на Светското првенство. Тој го опиша резултатот како „срамен“. Натпреварот беше обележан и со два црвени картони за азискиот тим, Хомам Ахмед и Асим Мадибо, од кои вториот беше поради прекршок врз Исмаел Коне, по што канадскиот играч беше сериозно повреден и има скршена нога.
„Првото нешто што сакам да го направам е официјално да се извинам на Канада, на нивниот тренерски штаб и особено на момчето Исмаел Коне. Она што се случи беше неприфатливо. Нашиот играч направи екстремно задоцнет, опасен и луд старт одзади. Нашата дисциплина денес целосно исчезна. Асим Мадибо беше во шок во соблекувалната, се држеше за главата кога сфати што направил и колку е сериозна повредата на Коне. Ние не сме тим што игра така и длабоко ми е жал“, започна Лопетеги.
„Резултатот од 0:6 е исклучително болен и срамен за нас, но тоа е реалноста. Кога ќе добиете два црвени картони по ред и ќе останете на теренот само со 9 играчи против толку брз, моќен и агресивен домаќин како Канада, натпреварот е едноставно завршен за вас. Тие го искористија секој празен простор на овој широк терен. Во првото полувреме се обидовме да се држиме, но по паузата и црвените картони сè се сруши за неколку минути“, додаде Шпанецот.
Тој го минимизираше скандалот со селекторот на Канада, Џеси Марш, на аут-линијата.
„Емоциите на аут-линијата беа превисоки. Целосно го разбирам гневот на Џеси Марш, тој го бранеше својот повреден играч. Мојата реакција во тој момент беше диктирана и од тензијата. Веќе се сретнавме во тунелот по натпреварот и се ракувавме. Фудбалот е игра на емоции, но инцидентите треба да останат на теренот. Сега треба брзо да ги разбистриме главите бидејќи пред нас е последниот натпревар во групата и треба да покажеме сосема поинакво лице“, заклучи стручњакот.
