Александар Зверев ја искористи својата прва недела на првото место на светската ранг-листа за да започне нов напад врз Борис Бекер. Војната меѓу двајцата најдобри играчи во историјата на германскиот тенис се разгоре во последните месеци, по освојувањето на два Гренд слем турнири, бидејќи Саша е уморен од слушањето на критиките на Борис.
Неодамна, Бекер возврати уште посилно:
– Родителите на Саша се од Русија, тој не зборува јавно за војната во Украина, а на Германците тоа не им се допаѓа – најмладиот победник на Вимблдон го објаснува тврдењето дека Зверев не е популарен во Германија. Роден е во Хамбург.
– Дава интервјуа многу подобро на англиски јазик, додека неговите изјави на германски јазик се кратки и сувопарни. Дури и не е учтив кон новинарите. Попријатен е на англиски отколку на германски – неодамна изјави Бекер за „Дер Шпигел“.
Зверев сега возврати:
– Борис, како и секогаш, зборува глупости. Не знам што се случува сега со него, но имам впечаток дека сака да коментира за сè што се случува. Бара најмала причина да ме потцени. Навистина не разбирам зошто мисли дека треба да давам политички изјави. Имам јасен став за сè, но никој не ме прашал ништо за тоа. И не сум од оние што коментираат такви работи на Инстаграм.
Тврди дека неговата популарност е голема и дека зборовите на Бекер не се вистинити.
– Во финалето на Ролан Гарос, почувствував дека 70 проценти од луѓето се со мене – се присети на дуелот против Флавио Коболи. – На Вимблдон против Синер беше 50:50, само на Отвореното првенство на САД имаше повеќе луѓе за Шелтон, но тоа е нормално затоа што е Американец, порача бр.1 во светот.
