Томас Тухел го изрази своето разочарување по поразот на Англија од Аргентина со 2-1 во полуфиналето на Светското првенство во 2026 година во САД, Канада и Мексико. „Трите лава“ водеа со 1-0, но потоа примија израмнувачки гол во доцниот дел од натпреварот, а тренерот рече дека неговиот тим бил премногу пасивен и не успеал да го затвори натпреварот на време.
„Разочарани сме. Бевме толку блиску, но по голот станавме премногу пасивни. Дозволивме премногу центаршути, шанси и шутеви. Бевме блиску, но откако постигнавме гол не можевме да го одржиме нашето ниво.
Одлучивме да преминеме на одбрана од петмина бидејќи просторите беа преголеми и за да бидеме посилни во воздухот. Веднаш по голот, пред да ги направиме замените, дозволивме премногу центаршути. Се обидовме да им помогнеме на играчите, но одговорноста е на тренерот.
Секако дека сакавме да одиме на втор гол, но тоа не може да се случи ако немате посед на топката. Станавме премногу пасивни и не можевме да ја задржиме топката. Не мислам дека проблемот беше во структурата. Играта се промени целосно и разбирам дека има вакви дискусии, и има милиони тренери кои знаат подобро. Но, морам да донесам одлука.
Не жалам, барем не во тој момент. Бевме многу блиску и заслужено водевме со 1:0. До овој момент одигравме еден од нашите најдобри натпревари, можеби дури и најдобриот“, рече Тухел.
Така, Англија повторно не успеа на еден чекор од финалето, слично на фијаското од 2018 година во Руската Федерација, кога повторно загуби во полуфиналето, дозволувајќи пресврт од 1:0 на 1:2, а потоа отстапи место на Хрватска. Пред осум години, „трите лава“ ја загубија и битката за бронзениот медал, која беше против Белгија, а сега претстои мало финале против Франција. Закажано е за 19 јули (недела) во 23 часот по македонско време.
