Серхио Скариоло го заврши својот престој во Реал Мадрид, но искусниот италијански стручњак не планира долго да биде без работа. Иако сè уште се чека официјална потврда од клубот, шпанските медиуми објавуваат дека заминувањето е практично завршена работа, по сезона во која Реал Мадрид не освои ниту еден трофеј. Скариоло наводно добил отпремнина од три милиони евра, но според „Диаиро Спорт“, тој веќе размислува за следниот чекор во кариерата.
Италијанецот сè уште сака да тренира клуб на високо ниво, а Шпанија и Италија се споменуваат како можни опции. Особено е интересно што, и покрај неуспешната сезона во Мадрид, Скариоло би можел да остане во Ендеса лигата.
Една од опциите што се споменуваат е Барселона, која сè уште не го решила прашањето за нов тренер. Каталонците преговараат со Паоло Галбијати, но доколку таа работа не биде завршена, Скариоло би можел да стане сериозна алтернатива.
Валенсија, која остана без тренер откако Педро Мартинез замина во Реал Мадрид, исто така е во игра. Таквиот исход би бил особено интересен, бидејќи Скариоло практично би можел да го замени тренерот кој го заменува во Мадрид.
Сепак, најконкретната опција што се споменува во моментов е враќање во Италија, каде што Баскет Рома СПКР, нов амбициозен проект поддржан од Лука Дончиќ и искусниот НБА оперативец Дони Нелсон, покажува интерес.
