Македонскиот репрезентативец Тео Симиќ продолжува со одличните настапи на почетокот од својата американска авантура. Центарот на Тексас Арлингтон го забележа првиот „дабл-дабл“ во НЦАА лигата, откако во убедливата победа над Бетесда од 116:65 оствари двоцифрен учинок во две статистички категории.
Симиќ натпреварот го заврши со 12 поени и 13 скокови за 22 минути поминати на паркетот, потврдувајќи дека може да биде значаен фактор во играта на својот нов тим. Македонскиот кошаркар беше еден од осумтемина играчи на Арлингтон кои постигнаа најмалку 10 поени.
Тексас Арлингтон уште во првото полувреме ја најави убедливата победа, на пауза заминувајќи со предност од 57:32. Во продолжението разликата дополнително растеше, а на крајот тимот стигна до третата победа во четвртиот натпревар сезонава.
Најефикасен во победничкиот состав беше Ноа Шелби со 22 поени, додека Тајсен Мекданиелс запиша 16 поени и 12 скокови. Мајлс Гудман исто така имаше дабл-дабл со 15 поени и 13 скокови, колку што во скоковите собра и Симиќ.
За македонскиот центар ова е уште еден добар сигнал по одличното издание против Портланд, кога постигна 24 поени и беше најдобар стрелец на Арлингтон во победата од 89:85.
Следниот предизвик за Симиќ и неговите соиграчи е дуелот со УТРГВ, закажан за 14 ноември. Македонскиот кошаркар има добар почеток на американската сезона и постепено се наметнува како важен дел од ротацијата на Арлингтон.
