Српскиот тенисер, Новак Ѓоковиќ неодамна предложи промена во начинот на кој се брои во тенисот: сетови да се играат во четири добиени гема, натпревари како овој да се играат во три добиени сета и предноста да се укине, односно првиот поен на 40:40 да биде одлучувачки.
Жоао Фонсека го даде своето мислење на оваа тема по неговата победа против Стефанос Циципас,
„Играв во овој формат на Next Gen и имав добро искуство“, нè потсети 19-годишниот Бразилец дека го освоил ова натпреварување во Џеда пред две години. „Затоа не можам да се жалам за тоа. Но, мислам дека Новак го предлага ова поради неговите физички способности. Тој старее“, се насмеа Фонсека.
Фонсека неодамна одлично ги искористи годините на Ѓоковиќ на Ролан Гарос. Иако ги загуби првите два сета, направи пресврт.
„Не велам дека е добар или лош предлог. Но, ова е класичен тенис, историја… Секогаш се играло на најдобар од шест гема и мислам дека тоа е важно“, истакна Бразилецот.
Начинот на броење веќе е променет неколку пати во тенисот. До 1971 година, немаше тајбрејк, туку се играше на разлика од два гема. Потоа беа воведени тајбрејкови освен во решавачкиот сет на Гренд слем турнирите. Пред неколку години, и тоа беше променето и беше воведен супер тајбрејк.
Намерата на Ѓоковиќ не е да ги скрати натпреварите поради своите години, бидејќи до моментот кога тоа потенцијално ќе се воведе, веројатно ќе биде во пензија, туку да ги скрати натпреварите на околу два часа максимум.
