Белорусинката Арина Сабаленка играше пет Гренд слем финалиња во последните две години и победи само во едно. Во сите тие порази, таа имаше шанса да победи, честопати беше фаворит и речиси никогаш не можеше да го прифати поразот на спортски начин. Речиси секогаш го губеше трпението, не се однесуваше добро кон противничките итн…
Најдобар пример е неодамнешниот натпревар за трофејот на Отвореното првенство на САД. Откако загуби од Јелена Рибакина, од која го загуби и бројот 1, таа го скрши рекетот, а потоа беше казнета со 7.500 долари.
– Арина се уништува себеси – ја анализираше нејзината игра познатиот тренер Патрик Муратоглу. – Ја разбирам нејзината разочараност. Губењето на Гренд слем финале е многу тешко за поднесување, особено ако имате добри шанси за победа. Сите овие емоции се нормални, но таа не може да ги контролира и завршува лошо за неа, смета тој.
Сопственикот на академија на Азурниот Брег го објаснува ова со последниот пример:
„Она што го видовме во Њујорк се повтори многу пати во последните две години. Таа го губи финалето, го фрла рекетот пред да ѝ честита на противничката. Го крши на стол додека нејзината соперничка го слави нејзиниот триумф. Камерата се фокусира на неа, а потоа го пцуе камерманот…“
Иако е светски број еден повеќе од 100 недели, иако е сопственик на четири трофеи од најголемите турнири, Сабаленка се чини дека не научила да се контролира кога тензијата е најголема. Од друга страна, ако не знаеше како да го направи тоа, немаше да ги освои тие четири трофеи, но сега очекувањата се големи, таа беше фаворит во сите тие натпревари и затоа не можеше да се справи со притисокот.
– Кога работите тргнуваат наопаку, таа не може да се справи со тоа, станува многу негативна и почнува да игра лошо. И колку подолго тоа трае, толку повеќе нејзиното ниво на игра паѓа, анализира Муратоглу.
Сабаленка во изминатата година загуби три големи финалиња од Рибакина – на завршниот Мастерс во Ријад, во Мелбурн и сега во Њујорк.
– Нивното соперништво ме потсетува на она на Џон Мекинро и Бјорн Борг. Едниот е оган, другиот е мраз. Значи, Борг секогаш беше смирен и ја контролираше ситуацијата, додека Мекинро кршеше рекети и полудуваше. Но, има една разлика, Мекинро играше подобро по своите напади на бес, а Сабаленка по нив губи натпревари. Во моментот кога ќе научи да ги контролира своите емоции, таа повторно ќе освојува Гренд слем титули, заврши тој.
