Седумкратниот светски шампион Луис Хамилтон изјави дека тензиите за време на неговиот престој во Мерцедес биле „далеку полоши“ од моменталната динамика меѓу него и Шарл Леклер во Ферари.
Двајцата имаа напната трка во Мексико Сити во неделата откако Леклер го нападна Хамилтон за водство во првиот круг. Маневарот ги исфрли двајцата возачи од патеката. Макс Верстапен и Ред Бул ја искористија ситуацијата, а Холанѓанецот ја освои победата.
Хамилтон призна по трката дека е исклучително иритиран од она што се случило. Британецот има богато искуство со комплицирани односи со тимските колеги во текот на годините, вклучително и со Фернандо Алонсо во Мекларен и Нико Розберг во Мерцедес. Според него, соперништвото со Розберг било неспоредливо поболно од судирот со Леклер.
„Имав многу потешки периоди во Мерцедес“, коментираше Хамилтон за медиумите. „Имаше навистина ужасни моменти, па не гледам никакви огромни разлики. Во Мерцедес, ситуацијата беше добро управувана и мислам дека Фред исто така дава се од себе. Тој дојде да разговара со мене пред трката и мислам дека беше загрижен бидејќи сака двајцата негови возачи успешно да настапат.“
Инцидентот во првиот круг му овозможи на Верстапен да го престигне Хамилтон, а малку подоцна и Леклер, кој доби казна од пет секунди за нелегално стекнување предност. Така, тимот на Ферари пропушти одлична можност да ја забележи третата победа во сезоната.
Хамилтон повторно нагласи дека ризикот што го презеде неговиот тимски колега бил целосно неоправдан:
„Ако нападнам одзади, го преземам целиот ризик и на крајот тимот изгуби, ќе морам да ја преземам одговорноста бидејќи тоа влијае на многу луѓе. Но, во овој случај бев во водство и тој маневар беше едноставно непотребен. Мислам дека лесно можевме да постигнеме двојна победа. Тоа ќе беше огромен успех за тимот и за сите во фабриката кои работеа толку напорно на новите подобрувања.“
