Светскиот шампион во Формула 1, Ландо Норис, призна дека е „умерено оптимист“ дека големиот пакет за надградба за Големата награда на Унгарија може да помогне во трансформацијата на неговата и сезоната на неговиот тим.
Актуелниот шампион кај возачите се бори да ја одбрани титулата оваа сезона. Ландо е петти во генералниот пласман, откако освои само два подиума во првите десет трки од годината.
Но, со низа подобрувања што треба да се вградат во болидот MCL40 непосредно пред летната пауза, Британецот сака да биде уверен дека тие ќе решат некои од проблемите што го мачат тимот од Вокинг.
Мекларен ќе воведе ревидиранo подвозје како централен дел од промените, со понатамошни аеродинамични подобрувања, вклучувајќи тестирање на неговото експериментално задно крило на тренинг.
Запрашан за целокупниот пакет на тимот за викендот во Будимпешта и какви се неговите очекувања, Норис се обиде да ја намали можноста за непосредно влијание.
„Веројатно сè уште го имаме најдобриот целокупен пакет со погонскиот склоп“, рече тој. „Значи, се надевавме на добар викенд во Спа. Сè уште се надеваме дека ќе биде добар викенд и тука; да бидеме искрени, ќе мора да почекаме и да видиме какво ќе биде влијанието на подобрувањaта. Мислам дека сакаме да бидеме оптимисти. Сакаме да бидеме самоуверени и да се надеваме дека тоа ќе реши некои од проблемите со кои се бориме во моментов, а кои нè ограничуваат.“, изјави тој.
Сепак, Норис бил разочаран и претходно и внимава да не ги зголемува очекувањата само за повторно да биде разочаран.
„Имаше неколку подобрувања оваа година кои можеби не се одвиваа толку добро колку што се надевавме, па мислам дека сме само малку повнимателни – секако сум – и чекаме да видиме дали ќе се одвива толку добро како што очекуваме“, призна Британецот.
Но, ако подобрувањата можат да го намалат времето на круг на MCL40, 26-годишниот пилот верува дека Хунгароринг е патека каде што новиот пакет може да се истакне.
„Па се надевам дека, како комбинација, ова е добра патека за нас и со овој автомобил ќе имаме добар викенд. Со нетрпение го очекувам тоа.“, додаде тој.
