Британската влада побара од ФИФА да ја истражи репрезентацијата на Аргентина откако играчите држеа транспарент со порака за Фолкландските Острови по полуфиналето на Светското првенство против Англија.
Аргентина ја победи Англија со 2-1 во полуфиналето на Светското првенство во Атланта во средата, а за време на прославата играчите позираа со транспарент што им го дадоа навивачите на трибините.
На него пишуваше „Las Malvinas son Argentinas“ или „Малвините се Аргентински“.
Британскиот министер за бизнис и трговија, Питер Кајл, го опиша потегот како несоодветен и рече дека очекува темелна истрага. Тој за Би-Би-Си изјави: „Политиката мора да се одвои од фудбалот“.
Тој додаде дека сега тоа е прашање на ФИФА.
🇦🇷 | Argentina players after the game with banner stating: “Las Malvinas Son Argentinas” 👀😅#FIFAWorldCup pic.twitter.com/yCMGvuXmlK
— ULTRA ATTACKIVE (@UltraAttackive) July 15, 2026
Аргентина ги нарекува Фолкландските Острови Малвински Острови. Спорот околу јужноатлантскиот архипелаг трае со децении, а војната од 1982 година, предизвикана од инвазијата на тогашната аргентинска воена диктатура, траеше десет недели и заврши со британска победа. Во конфликтот загинаа 649 аргентински војници, 255 британски војници и тројца островјани.
Дисциплинскиот кодекс на ФИФА дозволува играчите и федерациите да бидат казнети за пораки што се несоодветни за спортски настан, вклучувајќи политичка, идеолошка, религиозна или навредлива содржина. Казните за политички пораки се движат од 5.000 до 20.000 долари, а суспензии се користени и во претходни случаи.
Репрезентативецот на Аргентина, Лисандро Мартинез, рече дека прикажувањето на транспарентот „навистина разбудило длабоки емоции“.
„Можам да замислам како ветеран од Малвините го гледа и плаче. Не знам дали ќе има санкции, но тие го покажаа тој транспарент и рекоа дека островите ни припаѓаат“.
Леандро Паредес рече дека тоа е болен дел од историјата и дека и тие играле за нив.
Од ФИФА е побарано коментар, а Аргентина ќе го игра финалето против Шпанија во недела во Ист Радерфорд, Њу Џерси.
