Словенечкиот селектор Боштјан Цесар не го криеше задоволството по убедливата победа од 3:0 над Македонија во Скопје, со која неговата репрезентација го потврди второто место во групата Б1 од Лигата на нациите и обезбеди место во дополнителните квалификации за пласман во А-дивизијата.
Цесар по натпреварот истакна дека неговите фудбалери ги исполниле договорените задачи и дека клучно било тоа што знаеле каде Македонија има слабости.
„Одигравме натпревар во кој направивме нешто големо. Иако мислевме дека ќе се соочиме со поголем предизвик, резултатот е одличен за нас. Среќни сме што сè што договоривме го остваривме на теренот. Тоа донесе голема победа. Имаме нови играчи кои добро се вклопија. Тимски доаѓаме до успех. Имаме уште доста предизвици, но сме на добар пат“, изјави словенечкиот селектор по натпреварот.
Тој не ја криеше ниту тактичката подготовка за гостувањето во Скопје, нагласувајќи дека Словенците точно знаеле што треба да направат за да стигнат до трите бода.
„Влеговме со голема самодоверба. Ги знаевме слабите точки на противникот и истите ги искористивме. На моменти беше тешко, но не дозволивме Македонија да нè надигра“, порача Цесар.
Во изјава за словенечките медиуми, тој дополнително го потенцираше карактерот на натпреварот, оценувајќи дека неговите фудбалери одиграле физички силен дуел и дека покажале зрелост во моментите кога домашната селекција се обидувала да се врати во натпреварот.
„Одигравме машки натпревар. Знаевме дека нема да биде лесно и дека во одредени моменти ќе мора да трпиме. Но направивме нешто големо и многу сум задоволен што играчите настапија на толку високо ниво и ја победивме Македонија“, изјави Цесар за словенечките медиуми.
Словенечкиот селектор посебно го истакна и фактот дека репрезентацијата сè подобро ги прифаќа неговите фудбалски принципи, а како позитивен момент го посочи и вклучувањето на нови играчи во националниот тим.
Победата во Скопје беше потврдена со головите на Данјел Штурм во 29. и 90+1. минута, како и на Давид Зец во 66. минута. Словенија го заврши циклусот со 11 освоени бодови, зад Швајцарија, и сега ќе има можност преку дополнителните квалификации да се избори за место во најсилната дивизија на Лигата на нациите.
За разлика од Словенците, македонската репрезентација го заврши настапот со шест порази на шест натпревари и со само еден постигнат гол. Разликата меѓу двете селекции не беше само во конечниот резултат, туку и во начинот на кој едната знаеше што сака да направи на теренот, а другата повторно остана без одговори.


