Репрезентативецот на Македонија и член на Сараево, Агон Елези, пред дуелите на нашата селекција со Швајцарија, Словенија и Шкотска во Лигата на нациите, изјави дека фокусот на репрезентацијата во овој момент е целосно насочен кон Швајцарија.
„Не очекуваат четири многу тешки натпревари, но моментално за нас постои само еден, тој во сабота против Швајцарија. Сите ги знаеме нивните квалитети и ние мораме да се фокусираме само на себе, да не правиме грешки, затоа што секоја наша грешка може многу да не чини.
Швајцарија покажа на Мундијалот дека е во сериозна форма и дека има сериозни квалитети во секој поединец. но, ние треба да се фокусираме на себе и да имаме доверба дека можеме да направиме позитивен резултат. така и ќе влеземе во натпреварот. Најбитно на претходните натпревари беше да се запознаеме со новиот стручен штаб, со новите играчи и со новите идеи. Сметам дека ни донесоа многу и дека научивме многу.
Најважно беше да направиме добра атмосфера меѓу нас, меѓу играчите, а тоа и се покажа. Сите сме во добра атмосфера, имаме добра кохезија и сега само тоа треба да го пренесеме на теренот, почнувајќи од сабота.“, истакна тој, цитиран од ФФМ.
Првиот предизвик за избраниците на Гоце Седлоски е дуелот со Швајцарија на 26 септември во Скопје, по што следуваат гостувањето кај Словенија на 29 септември, гостувањето кај Швајцарија на 6 октомври во Луцерн и натпреварот против Шкотска на 3 октомври во Скопје.
Натпреварот Македонија – Швајцарија се игра со почеток во 20:45 часот на Националната арена „Тодор Проески“ во Скопје.
