Вест Хем ќе продолжи да биде предводен од Нуно Еспирито Санто и следната сезона, и покрај испаѓањето од Премиер лигата, откако одборот и португалскиот стручњак одлучија да ја продолжат соработката со цел брзо враќање во елитата на англискиот фудбал.
Португалецот се сретна со челниците на клубот во понеделникот по испаѓањето на Вест Хем од Премиер лигата.
Иако двете страни можеа да ја прекинат соработката без надомест, тие одлучија да продолжат заедно со надеж дека Нуно ќе го повтори успехот што го постигна со Вулверхемптон, кога освои промоција во Премиер лигата во 2018 година.
„Со задоволство потврдуваме дека тој ја изрази својата целосна посветеност на клубот, како што направивме и ние. Нуно јасно стави до знаење дека е многу мотивиран од предизвикот да го врати Вест Хем во Премиер лигата од првиот обид. Ова мора да биде неоспорна цел за следната сезона“, се вели во отвореното писмо до навивачите од клубот.
„Чеканите“ испаднаа во Чемпионшип лигата за прв пат од 2012 година.
Се проценува дека клубот ќе изгуби околу 200 милиони фунти приходи како резултат на испаѓањето, што значи дека продажбата на играчи е неизбежна. Меѓу играчите за кои има голема побарувачка се капитенот Џерод Бовен и португалскиот играч од средниот ред Матеуш Фернандеш.
