Капитенот на Хајдук, Марко Ливаја, ги заврши подготовките во Блед порано и се врати во Сплит, а причината, како што е наведено во официјалното соопштение на клубот, е прекршување на дисциплинските правила на клубот.
Иако Хајдук не откри што точно се случило, хрватските медиуми објавија детали за инцидентот што претходеше на одлуката на клубот.
Според „Далматински портал“, тимот на Хајдук организирал друштвено собирање по победата на Хрватска над Гана. После тоа, група од осум играчи наводно отишле на пијалок за да го прослават триумфот на тимот. Се вели дека останале кратко време, но информацијата стигнала до клубот, што не било добро прифатено од спортскиот директор Роберт Граф.
На следниот тренинг, тренерот Гонзало Гарсија одлучил да ги казни играчите кои ги прекршиле правилата со дополнително трчање. Оваа одлука не му се допаднала на Ливаја, кој влегол во жестока вербална расправија со Гарсија и Граф.
Конфликтот, според истите извори, бил толку сериозен што била донесена одлука капитенот веднаш да го напушти тренингот и да се врати во Сплит.
Во официјално соопштение, Хајдук ја потврди одлуката за отстранување на Ливаја од подготовките.
„Марко Ливаја ќе ги напушти подготовките во Блед порано од планираното и ќе се врати во Сплит. Одлуката е донесена поради прекршување на дисциплинските прописи на клубот и непочитување на правилата утврдени од клубот за време на неговиот престој на подготовките.
Марко е од непроценливо значење за клубот, навивачите и сите што го сакаат и живеат Хајдук. Оваа одлука е донесена само со еден интерес – Хајдук е на прво место. Секогаш и засекогаш. Јавноста ќе биде навремено информирана за понатамошните одлуки“, се вели во соопштението.
Хајдук се подготвува за новата сезона во Блед од 22 јуни. Сплитскиот тим досега одигра два пријателски натпревари и постигна исто толку победи. Прво, ја победија Шкендија со 4-0, а потоа и украинскиот ЛНЗ Черкаси со резултат од 1-0.
Ливаја постигна гол за 45 минути на теренот во првиот натпревар, додека во вториот одигра 70 минути без никаков ефект. Поради одлуката на клубот, тој ќе го пропушти и последниот тест натпревар против Целје, кој е закажан за 1 јули.
Искусниот напаѓач се врати во Хајдук во февруари 2021 година и оттогаш стана лице на клубот. Тој одигра 202 натпревари за „белите“, постигнувајќи 104 гола и запишувајќи 50 асистенции, а воедно освои и два трофеи во Купот на Хрватска.
