Привремениот менаџер Мајкл Карик е одговорен за големиот пресврт во сезоната на англискиот фудбалски клуб Манчестер Јунајтед, изјави капитенот Хари Мегваер по победата од 2-1 против Брентфорд.
„Црвените ѓаволи“ завршија на 15-то место минатата пролет, a сега се трети и сигурно ќе играат во Лигата на шампионите.
„На почетокот од нашиот период со Мајкл имавме два многу тешки натпревари со Арсенал и Манчестер Сити и луѓето мислеа дека сме во неволја. Но, зедовме шест бода. Сите верувавме во тоа и го направивме тоа заедно. Ни даде самодоверба и знаевме дека можеме да постигнеме гол од секоја ситуација“, рече Мегваер, кој му асистираше на Касемиро за првиот гол против Брентфорд.
Јунајтед има 61 бод, цели 11 повеќе од шестопласираниот Брајтон, кој е прв под линијата за Лигата на шампионите. Остануваат само четири натпревари до крајот на сезоната.
„Резултатите зборуваат сами за себе. Почнавме да победуваме откако тој дојде и ја смени шемата. Со Рубен (Аморим), натпреварите беа 50/50, но во повеќето случаи губевме. Сега е спротивното. Подобри сме во двата шеснаесетника, се браниме соодветно и постигнуваме голови“, додаде дефанзивецот.
