Португалецот Жозе Мурињо е првиот избор на претседателот на клубот, Флорентино Перез, за нов тренер на Реал Мадрид. Ова го објави британскиот новинар Дејвид Орнштајн.
Евентуалното назначување на 63-годишниот стручњак веројатно ќе наиде на внатрешен отпор во Реал, но според Орнштајн, одлучувачкиот збор ќе го има Перез, кој е подготвен да му даде втора шанса на Специјалниот.
Мурињо беше тренер на Реал од 2010 до 2013 година и ги постави темелите за некои од најголемите успеси за „белиот клуб“, кој ја освои Лигата на шампионите шест пати помеѓу 2014 и 2024 година.
Мурињо моментално е на чело на португалската Бенфика – уште еден клуб што го води по втор пат во својата кариера. Според медиумите, тој има клаузула во договорот во износ од 3 милиони евра, што не би требало да биде проблем за Реал да го привлече.
Во својата кариера, Португалецот, кој двапати ја освои Лигата на шампионите со Порто и Интер, ги водеше и екипите на Униао Леирија, Порто, Челзи, Интер, Манчестер Јунајтед, Тотенхем, Рома и Фенербахче.
