Повратникот во елитното фудбалско друштво во Македонија, Брегалница Штип ја оствари првата победа во новата сезона откако на свој терен вчера ја совлада екипата на Арсими со убедливи 4-0. Пред своја публика штипскиот тим низ целосна доминација успеа да стигне до посакуваните три бода.
Мартин Стојанов уште во 10. минута донесе предност за домашниот тим. Од левата страна центрираше Максимов, и Стојанов од прва го совлада Сиљановски за предност на Брегалница.
Токму асистентот Максимов, во 28. минута се запиша во листата на стрелците. Убаво го зафати центаршутот од десната страна, и со глава успеа да ја смести топката во долниот лев агол за предност од два гола.
Во второто полувреме продолжи доминацијата на Брегалница, која беше крунисана со гол на Мартин Стојанов.
Арсими после третиот примен гол ја презеде иницијативата, но сите нивни обиди беа неутрализирани од страна на домашните играчи.
Тасев во 86. минута успеа да постигне четврти гол за Брегалница по асистенција на Лука Георгиев, за конечни 4-0 од овој меч.
