Патрик Муратоглу, еден од најпознатите тренери, но и сопственик на една од најдобрите академии во светот, не верува дека Карлос Алкараз ќе биде подготвен да го брани својот трофеј на Парискиот гренд слем.
„Врз основа на информациите што ги имаме, не гледам како ќе може да игра на Ролан Гарос“, вели францускиот стручњак кој стана познат по соработката со Серена Вилијамс, која освои десет големи трофеи со него.
Муратоглу беше и со Холгер Руне кога ја имаше таа одлична серија на крајот од 2022 година, но неодамна доживеа неуспех со соработката со Наоми Осака.
– Од една страна, ми е мило што Карлос одлучи повеќе да се грижи за својата кариера и иднина, а помалку за краткорочните цели, вели тој.
Потоа Патрик објаснува како дошол до заклучок дека Шпанецот има мали шанси да се бори за трет последователен „Куп на мускетари“:
„Колку е сериозна неговата повреда? Немам поим. Можеби не е толку сериозна. Но, моето искуство ми кажува дека ако одлучиле да му стават рака во гипс, тоа не е добар знак. Прво, затоа што зглобот мора да биде целосно мирен. Второ, мора да биде во гипс уште една, две, три недели, никој не знае колку долго“.
Алкараз се повлече откако го освои првото коло во Барселона, потоа се повлече од натпреварувањето во Мадрид, а во понеделникот се појави на церемонијата „Лауреус“ со зглобот во гипс и да каже дека сè уште не знае дали ќе игра во Рим и Париз, дека тоа ќе зависи од следните тестови.
– Додека раката е во гипс, мускулите не работат, почнуваат да атрофираат и потоа ќе им треба време да се вратат во форма – објаснува Муратоглу. – Затоа ми е незамисливо во овој момент дека ќе може да игра во Париз.
Муратоглу се потсети што рекол Карлос: „Јасно е колку е важен овој момент за него сега. Тој ги освои последните два трофеи на Гарос, се бори за првото место со Јаник Синер, но самиот рече дека неговата кариера е долга и не сака да ја загрози за некоја краткорочна цел, без разлика колку е важна“.
Доколку Алкараз не игра во Рим и Париз, ќе му даде ветер на грб на Синер за значително да ја зголеми својата предност на врвот на светската ранг-листа и да ја продолжи својата серија големи титули. Затоа, одлуката евентуално да се откаже од патувањето во Париз ќе биде многу болна за најдобриот спортист во светот, но прашањето е дали има избор ако не сака многу посериозно да ја загрози својата кариера.
