Извршниот директор и претседател на Формула 1, Стефано Доменикали, објави дека воопшто не е загрижен за негативните реакции на тимовите и возачите на промените во техничките прописи.
„Не можам да ја разберам паниката што ја гледаме сега“, прокоментира Италијанецот. „Со новите автомобили ќе има неверојатни трки, ќе има многу акција и тоа е најважното нешто. Мора да останеме смирени, бидејќи секогаш кога има нови прописи – како во 2014, 2017 и 2021 година – секогаш има сомнежи дека сè е погрешно. Воопшто не сум загрижен.“
Доменикали додаде и дека прилагодувањето на следната генерација автомобили е прашање на време, возачите треба да се навикнат на тоа и предвиде дека нивните коментари наскоро ќе се променат.
„Развојот на технологијата бара сосема поинаков начин на возење на новите автомобили“, објасни Доменикали. „Ова се случувало во минатото, ќе се случува и во иднина. Сигурен сум дека кога ќе стигнеме до средината на годината, ќе видиме сосема различни коментари од возачите. Ова е нормално за Формула 1.“, порача тој.
Доменикали, исто така, потврди дека имал приватни разговори со поранешниот светски шампион Макс Верстапен, кој е еден од најсериозните критичари на новите правила, а минатата недела Стефано објасни дека Макс нема да го напушти спортот поради новите технички правила и промените во болидите.
