Поранешниот шеф на Формула 1, Берни Еклстоун, предвиде дека битката за светската титула оваа сезона ќе биде решена помеѓу Андреа Кими Антонели и Макс Верстапен. Интересно е што 95-годишниот Британец ги отпиша шансите на тимскиот колегата во Мерцедес, Џорџ Расел.
Антонели забележа три последователни победи во првите четири трки од оваа сезона, а Расел триумфираше во Австралија, но по Мајами, 19-годишниот Италијанец има 20 поени предност пред Џорџ.
„Светски шампион ќе биде Антонели или Верстапен“, објасни Берни за швајцарскиот весник Блик. „Јасно е дека Ред Бул го надмина падот во перформансите. Макс се врати во својата најдобра форма, а кога ќе го стори тоа, тој е опасен.“
Четирикратниот светски шампион е седми на табелата со 26 поени, а поради тешкиот почеток на сезоната на Ред Бул, Макс сè уште не ги стигнал водечките и е 74 поени зад водечкиот Антонели. Ред Бул искористи сериозен пакет подобрувања на својот болид во Мајами и тоа се исплатеше, но на Макс и на тимот ќе им требаат многу подобри перформанси од сега па натаму ако Верстапен повторно сака да се бори за титулата.
Но, историјата на Формула 1 покажува дека Макс никогаш не треба да се отпишува од трката за титулата – по Зандворт минатата година тој беше 104 поени зад лидерот – тогаш тоа беше Оскар Пјастри, а на крајот од сезоната Макс остана 2 поени зад новиот светски шампион Ландо Норис, откако ги освои последните три трки од кампањата.
