Шпанскиот фудбалски гигант Валенсија постигна договор со американската инвестициска група Pitchwise Holdings за продажба на 42 проценти од акциите, во договор што ја проценува вкупната вредност на клубот, вклучувајќи го и долгот, на 1,25 милијарди евра.
Американскиот конзорциум, покрај купувањето на акциите, ќе обезбеди дополнителни 100 милиони евра свеж капитал за инвестирање во клубот, додека семејството Лим, кое го управува Валенсија од 2014 година, ќе го задржи мнозинскиот удел.
Киат Лим, син на сингапурскиот бизнисмен Питер Лим, кој ја презеде Валенсија од својот татко минатата година, ќе остане претседател на клубот.
Групацијата Pitchwise Holdings ја предводат поранешниот играч на МЛС, Кори Вулфолк, и Ан Родригез, долгогодишна спортска функционерка која работеше за Атланта Јунајтед, НБА и организацискиот комитет на Олимписките игри во Лос Анџелес 2028.
Меѓу инвеститорите се Хенри Кравис и Џорџ Робертс, коосновачи на американскиот инвестициски гигант KKR, една од најголемите компании за приватен капитал во светот. Двајцата влегуваат во договорот како приватни инвеститори, а не преку компанијата што ја основаа.
Дел од конзорциумот се Грег и Кери Пенер, кои имаат сопственички интереси во франшизата на НФЛ Денвер Бронкос и бејзбол клубот Колорадо Рокис.
Купувањето ќе се реализира преку стекнување на дел од акциите на компанијата „Меритон Холдингс“, која е во сопственост на семејството Лим, со дополнителна инвестиција од 100 милиони евра. Конечното спроведување на договорот зависи од одобрението на надлежните регулаторни органи во Шпанија.
„Ова е почеток на нова ера и убеден сум дека можеме да постигнеме големи работи со Валенсија. Сакаме модерен клуб, чии машки и женски тимови редовно ќе се натпреваруваат во Европа, академија што произведува врвни играчи и нов стадион што ќе биде еден од симболите на градот“, рече Киат Лим.
Kiat Lim y Pitchwise Holdings conforman una nueva alianza accionarial en el Valencia CF.
El Valencia CF anuncia hoy el comienzo de una nueva etapa en su historia.
🔗 https://t.co/ZK64E1HdFh https://t.co/AoRqPPrfFL
— Valencia CF (@valenciacf) October 23, 2026
Една од најважните причини за доаѓањето на американските инвеститори е завршувањето на изградбата на новиот стадион „Ноу Местаља“, проект кој претставуваше голем финансиски товар за клубот речиси две децении.
Изградбата на стадионот започна во 2007 година, но работите беа прекинати две години подоцна поради финансиски проблеми. Валенсија продолжи да игра на старата „Местаља“, додека недовршениот објект со години стоеше како потсетник за економските тешкотии на клубот.
Работата конечно продолжи во јануари минатата година, а беше обезбеден финансиски пакет во вредност од 322 милиони евра за завршување на проектот. Новиот стадион, со капацитет од нешто над 70.000 седишта, треба да се отвори во 2027 година, пред сезоната 2027/28.
Валенсија е еден од најуспешните шпански клубови, со шест титули во националните првенства, а последниот голем европски успех го постигна во 2004 година, кога го освои шпанското првенство и Купот на УЕФА под водство на Рафа Бенитез.
Под водство на Питер Лим, клубот го освои Купот во 2019 година, но последните сезони беа обележани со лоши резултати, финансиски проблеми и незадоволство на навивачите.
Новиот договор за сопственост доаѓа во особено тежок период. Валенсија е на 19-то место во Примера дивизион по девет кола, со само една победа, па новите инвеститори ќе имаат многу работа, покрај завршувањето на стадионот, за да ги вратат поранешните шпански шампиони во конкуренција за европските натпреварувања.
