Главниот извршен директор на Формула 1, Стефано Доменикали, ги коментираше новите правила што беа воведени во светското првенство на почетокот на годината и посвети посебно внимание на критиките што ги добија од Макс Верстапен.
Четирикратниот светски шампион е можеби најистакнатиот критичар на новите прописи, кои бараат од возачите да бидат многу повнимателни со начинот на кој го користат полнењето од своите хибридни системи. Сите овие негативни коментари плус инцидентот меѓу Оливер Берман и Франко Колапинто во Јапонија доведоа до преиспитување на прописите и веројатно е дека ќе има прилагодувања за Големата награда на Мајами на почетокот на месецот.
Одлуката за ова ќе биде донесена на почетокот на следната недела, кога ќе има состанок на Комисијата на Формула 1. И според Доменикали, челниците на спортот треба да го слушаат Верстапен кога одлучуваат за потенцијална промена на правилата.
„Моите дискусии со возачите се дефинитивно многу отворени и тие знаат дека ми е грижа за нивното мислење. Но, секако, понекогаш има игра. Ако разговарате со возачите кои се на чело, тие се среќни затоа што победуваат. Другите можат да бидат малку очајни затоа што сакаат различен вид трки, што јас го почитувам.
Им велам да не заборават дека правиме сè затоа што заедно ги направивме вистинските работи. Да покажеме почит кон спортот, кој ни даде на сите нас одлична можност да растеме, да заработуваме многу пари и да се развиваме како поединци, што во другите спортови не би можеле да го направиме. Тоа им го кажав и мислам дека беше прифатено.
Не ме прашувајте за балансот на силите бидејќи ќе најдете некој што ги почитува другите првенства. Мислам дека со Макс разговаравме многу пати од самиот почеток. Ги разбирам неговите коментари и тој ја разбира пошироката слика. Дури и денес беше на состаноци и сакаше да го каже своето мислење. Не сакам да паднам во стапицата каде што создавам непријателство бидејќи тоа не сум јас. Не сакаме да ги гледаме работите на тој начин.
Ќе бидеме обединети. Тој е најдобриот возач, тој е светски шампион, повеќекратен шампион и секако мора да ги слушаме неговите зборови. Тој исто така сфаќа дека неговиот глас има тежина и знае дека мора да му се пристапи со почит бидејќи понекогаш луѓето можат погрешно да го разберат. И тоа е нешто што не смееме да дозволиме да се случи“, објасни Доменикали за motorsport.com, пред да го сврти вниманието кон другите првенства кои дури почнаа да се потсмеваат на Формула 1.
„Не знам дали имате таква изрека во Англија, но во Италија луѓето секогаш сакаат да кажат дека тревата е позелена кај соседот. Но, понекогаш кога ќе одите на другата страна од оградата, гледате дека тоа не е сосема точно. Лично, мислам дека нашите трки се многу, многу добри. Колку повеќе разговараме едни со други, толку е подобро за спортот. Бидејќи тие, го велам ова затоа што сум стар, но не заборавам за што зборувам – скапоцениот камен во круната на нашиот спорт. Мораме да го заштитиме овој скапоцен камен, како и целиот екосистем“, рече шефот на Формула 1.
