Поранешниот светски шампион во бокс, Тајсон Фјури, се врати од пензија и го победи Арсланбек Махмудов на стадионот Тотенхем во Лондон.
По поразот од Олександр Усик, Фјури се пензионираше на крајот од 2024 година, а синоќа стигна до својата 35-та победа во професионалната кариера пред домашната публика.
Британецот славеше со убедлива победа на поени против Махмудов пред 54.331 гледачи по 12 рунди во кои доминираше. Двајца судии покрај рингот му ја доделија победата на Фјури со резултат 120-108, а еден 119-109.
Веднаш по последното ѕвонче, Фјури се наведна над јажињата и го повика Ентони Џошуа во рингот.
„Сакам да ти ја дадам борбата што сите ја чекавте. Те сакам, Ентони Џошуа. Ајде да им го дадеме на љубителите на боксот она што го сакаат, Битката за Британија. Сакам да се борам со тебе следниот пат, дали го прифаќаш мојот предизвик?“, извика Фјури. Џошуа, кој ја гледаше борбата од првиот ред, ја одби поканата, што го налути Фјури.
Anthony Joshua just DECLINED to face off with Tyson Fury in the ring 😳
“You’re a clout chaser. You ain’t gonna tell me what to do. I’m the boss. You work for me.” 🥶 pic.twitter.com/fx3Jo07GuR
— Happy Punch (@HappyPunch) April 11, 2026
„Голем кукавица си, ја сакаш борбата или не? Овој пат нема да ми избегаш. Ова се подготвуваше 10 години, конечно да се бориме“, рече Фјури.
Џошуа подоцна даде изјава за Нетфликс, кој треба да ја води борбата.
„Преговорите сè уште треба да се случат. Кога ќе бидат испратени договорите, ќе видиме. Најверојатно, нашата борба ќе се случи. Да ве потсетам, тој е оној што се пензионираше. Јас никогаш не се пензионирав. Јас сум оној што ги организира големите борби, јас ја водам играта, јас сум сериозен борец и сум многу силен. Кога ќе го удрам Фјури, ќе го повредам лошо. Во моментов средувам некои работи за моите браќа и нивните семејства“, рече Џошуа.
