🎬Сидни Свини и секси рекламата што ги налути спортистките

Рекламната кампања во која се појавува американската актерка Сидни Свини предизвика реакција од спортистките кои велат дека ги сексуализира жените во спортот.

Во реклама за платформата за спортски предвидувања Novig, Свини се појавува со малку или без облека, покривајќи делови од своето тело со стратешки поставени фудбалски топки и друга спортска опрема.

Бројни спортистки ја критикуваа рекламата на социјалните мрежи, нарекувајќи ја непочитувачка кон жените.

„Не можам да опишам колку сум лута кога го гледам ова“, напиша Арјарн Титмус, четирикратна олимписка шампионка во пливање, на Инстаграм.

„Како сè уште живееме во свет каде што женските тела се монетизираат и каде што сексуализацијата на женските спортови е сè уште присутна“?

Британската спринтерка Ејми Хант ѝ се обрати на актерката во интервју за BBC по нејзината трка во неделата, откако заврши четврта на 200 метри на Ultimate Championships во Будимпешта.

„Сидни Свини, вака изгледаат жените во спортот“, рече Хант, гледајќи во камерата. „Мускули, напорна работа, пот, крв и солзи.“

Поранешната американска гимнастичарка Грејси Крамер изјави дека рекламата ја оставила бесна.

„Целиот мој живот се натпреварувам во спорт каде што спортистките се претерано сексуализирани, сведени на своите тела и принудени да се борат за да бидат сфатени сериозно за она што навистина можат да го направат“, напиша Крамер на Инстаграм.