Пред полуфиналето на Светското првенство помеѓу Англија и Аргентина, кое е закажано за среда, аргентинските медиуми објавија информации што ги загрижија англиските навивачи.
Работата е дека, наводно, најголемата ѕвезда на англиската репрезентација, Џуд Белингам, потенцијално има проблем со повреда на левото рамо.
Повод за шпекулациите беше видео снимено по победата на Англија над Норвешка во четвртфиналето, на кое се гледа како играчот од средниот ред на Реал Мадрид оди низ микс зоната држејќи го левото рамо и покажувајќи знаци на болка.
Дополнително внимание привлече и сцените за време на разговорот со тренерот Томас Тухел, кога Белингам постојано го допираше истото рамо.
Британските медиуми, сепак, нè потсетуваат дека овој проблем не е нов. Белингам го измести левото рамо во март 2025 година за време на натпреварот на Реал Мадрид против Рајо Ваљекано, а поради компликации мораше да се подложи на операција минатото лето. Лузната од операцијата е сè уште видлива, додека болката повремено се јавува при голем напор.
И покрај ова, англискиот репрезентативец игра во одлична форма на Светското првенство. Тој постигна шест гола на шест натпревари, а во четвртфиналето против Норвешка беше херој на својот тим со два гола.
Прво, го донесе израмнувањето по асистенција од Ентони Гордон, а потоа во продолжението го постигна победничкиот гол и донесе пласман на Англија во полуфиналето.
Иако аргентинските медиуми го покренаа прашањето за неговото здравје, во англискиот табор нема страв дека Белингам ќе го пропушти дуелот со актуелниот светски шампион.
Се очекува тој да биде во почетниот состав за натпреварот на стадионот „Мерцедес-Бенц“ во Атланта, а доколку е потребно, ќе игра со заштитен завој, што веќе го направи за време на неговиот настап за Реал Мадрид.
Селекторот Томас Тухел сè уште има неколку кадровски сомнежи пред полуфиналето. Џордан Хендерсон сè уште се опоравува од скршена рака, додека Деклан Рајс имаше здравствени проблеми пред натпреварот против Норвешка, но освен тоа, Англија нема сериозни проблеми со повреди.
