На крајот од ужасната сезона, сè уште има зрак светлина за навивачите на Челси. Тимот од Лондон потврди дека Чаби Алонсо е нивниот нов тренер и дека тој потпишал четиригодишен договор на „Стемфорд Бриџ“.
Челси го доби својот седми тренер од летото 2022 година, седми главен тренер во ерата на Тод Боли, и трет од почетокот на сезоната 2025/26. Енцо Мареска беше отпуштен во јануари, а го наследи Лиам Розениор, чиј ангажман се покажа како сериозно фијаско поради кое „сините“ нема да играат во Лигата на шампионите следната сезона, а можеби и воопшто во Европа.
Алонсо беше предодреден за големи работи во Реал Мадрид, но соблекувалната го изеде и наместо да гради нова ера на Сантијаго Бернабеу, беше испратен во канцеларијата за невработени. Многумина веруваа дека преселбата во Ливерпул ќе биде природен следен чекор, но како што стојат работите, „црвените“ одлучија да му дадат уште една шанса на Арне Слот, а Чаби го прифати „најдоброто“ што се нудеше во моментов.
„Челси е еден од најголемите клубови во светот и ме прави исклучително горд што станав менаџер на овој клуб“, рече шпанскиот стручњак, продолжувајќи: „Од моите разговори со сопствениците и спортскиот менаџмент, јасно е дека ја делиме истата амбиција. Да изградиме тим способен постојано да се натпреварува на највисоко ниво и да се бори за трофеи“.
А потоа Чаби го погледна играчкиот кадар што ќе го најде по неговото пристигнување во клубот.
„Во тимот има голем талент и огромен потенцијал и затоа ќе ми биде голема чест да го водам. Сега фокусот е на напорна работа, градење на вистинската култура и освојување трофеи“.
Мандатот во Реал Мадрид не е најавторитетен, а претходно Чаби го водеше Баер Леверкузен брилијантно, носејќи му ја првата титула во германското првенство во историјата на клубот без ниту еден пораз. Во истата сезона, тој го освои и Купот на Германија, а го загуби и финалето на Лигата на Европа од Аталанта.
Од сезоната 2022/23, само двајца тренери (критериум со најмалку 100 одиграни натпревари) освоиле повеќе бодови во просек од Чаби. Луис Енрике има просек од 2,34, Карло Анчелоти 2,25, додека Шпанецот – 2,20.
