Тренерот на Баерн Минхен, Винсент Компани, кој е поранешен капитен на Манчестер Сити, одби да коментира за случајот со клубот, чија легенда е, но рече дека е горд на сè што постигнал на теренот со тимот на „граѓаните“.
„Играв за клубот 11 години и уживав во секој момент поминат таму. Навистина сум горд на сè што постигнавме и направивме на теренот. Што се однесува до сè друго – како играч не си дел од тоа. И во моментов, како тренер на Баерн (Минхен), не сум толку загрижен за таа тема. Мојот фокус е на подготовка за натпреварот следната недела, на натпреварот што треба да го добиеме и на сè друго поврзано со мојата тренерска работа“, рече Компани за време на неговата прес-конференција денес.
Белгиецот потоа се осврна на судирот со Аугсбург, кој го опиша како исклучително важен. Токму против овој противник шампионите го претрпеа својот единствен пораз во Бундеслигата минатата сезона.
„Вчера имавме целосен тренинг. Во сабота имаме важен натпревар, а играчите беа исклучително мотивирани. Сега фокусот повторно е целосно на Баерн. Тие сакаат постојано да ги докажуваат своите квалитети – и на тренинг и на претстојниот натпревар против Аугсбург. Се надевам дека овој тренд ќе продолжи и во наредните денови. Џамал Мусијала се повреди и е надвор од теренот, но освен тоа, сите се вратија здрави по обврските со националните тимови.
Ова е многу важен натпревар. Минатата година загубивме само еден натпревар во Бундеслигата и тоа беше против Аугсбург. На крајот на краиштата, тоа е дерби, а овој пат на гостински терен.“
Компани не сакаше да навлегува во шпекулации за шансите на неговите играчи за „Златната топка“.
„Се надевам дека играч на Баерн ќе победи. Но, за мене најважно е да се освои сè како тим. Тоа е приоритет и за Олисе и за Кејн. Тоа е она што ги издвојува овие играчи.“, додаде Белгиецот.
