Клубот Андора, предводен од сопственикот Жерар Пике, му дава целосна поддршка на својот голман Хесус Лазаро Овоно, кој е во шок по трагичниот инцидент на теренот, пишува „Марка“. Гвинејскиот голман сè уште не може да ја прифати трагедијата во која загина противничкиот играч Хесус де Мигел, а клубот вели дека нема да биде оставен сам да се грижи за себе.
„Чувството на вина не е исто што и да се биде виновен“ – е реченицата на спортскиот психолог Хозе Ортиз што одекнува во канцелариите во Андора овие денови. Овоно е психички скршен, се повлекол во својот дом и е опкружен со своите најблиски пријатели. Тој не ја напуштил куќата откако тимот се врати во Андора.
Неговата мајка е негова најголема поддршка, а бројни пријатели од светот на фудбалот исто така веднаш му притрчале на помош. Поранешни соиграчи од Виторија и Сан Себастијан пристигнале да бидат со него, а неговите агенти се во Андора за да му помогнат со сè што му треба.
Управата на клубот, предводена од Пике, кој вложи максимален напор и постојано е покрај голманот, прави сè што може за да му помогне. Соиграчите, тренерите и вработените во клубот се грижат Овоно да може да ги издржи овие тешки времиња. Според информациите, голманот постојано плаче. Напнатоста, која често ја поттикнуваа агресивни поединци на социјалните мрежи, полека се смирува. „Тој никогаш не би повредил намерно никого“, рече еден од капитените на тимот.
Улогата на Жерар Пике во овој момент е исклучително важна. Мнозинскиот сопственик на клубот лично го следи секој детаљ од ситуацијата. Денеска тој ја предводеше делегацијата на клубот во Навахермоса, родното место на родителите на Хесус де Мигел. Пике бил придружуван од претседателот на клубот Феран Виљасека и генералниот менаџер Хауме Ногес. Тие лично сакале да изразат сочувство, да понудат помош и да ја споделат болката со семејството.
Натпреварот на Андора закажан за викендот е одложен и тешко е да се замисли дека играчите би можеле да се вратат на теренот толку брзо. Иако често се вели дека враќањето на натпреварите помага во тешки ситуации, ова очигледно ќе потрае долго.
Изрази на сочувство и понуди за помош пристигнуваат од цела Шпанија. Здружението на шпански фудбалери (АФЕ) активно работи на обезбедување поддршка. Здружението вели дека Овоно нема да биде заборавен или оставен сам и дека ќе им помогне на сите погодени играчи, вклучително и на тимот на Тенерифе, кој е исто така во тешка емоционална состојба.
