Португалскиот тренер Жозе Мурињо е повторно на чело на Реал Мадрид оваа сезона, 13 години откако заврши неговиот прв престој во клубот. Неговото враќање врати спомени од времето поминато на „Сантијаго Бернабеу“, вклучувајќи го и прашањето зошто заминал во 2013 година.
Мурињо сега откри дека неговото заминување не се должи на недостаток на емоции или посветеност кон клубот, туку на верување дека на Реал Мадрид не му бил потребен тренер како него во тоа време.
Португалскиот тренер го водеше клубот од Мадрид од 2010 до 2013 година, освојувајќи ја титулата во шпанското првенство во сезоната 2011/12 и Купот во 2010/11.
Зборувајќи на церемонијата на отворањето на академската 2026/27 година, на Универзитетската школа на Реал Мадрид, која работи во рамките на Европскиот универзитет, Мурињо се потсети на својот прв мандат и нагласи дека неговата врска со клубот и навивачите никогаш не била прекината.
„Можев да останам во 2013 година, но си заминав од љубов кон клубот, бидејќи тогаш верував дека на тимот не му е потребен тренер како мене“, рече Мурињо, како што објави шпанскиот весник „Спорт“.
Тој истакна дека во текот на сите 13 години што бил отсутен од Мадрид, секогаш го сакал најдоброто за Реал.
„Ова е еден од моите домови, всушност мојот дом. Така се чувствував кога бев тука, но и во текот на 13-те години што ги поминав надвор од клубот. Секогаш го сакав најдоброто за Реал Мадрид и сакав неговите навивачи да бидат среќни. Од првиот ден чувствував дека припаѓам на идентитетот на овој клуб и сè што тој претставува“, рече Португалецот.
Мурињо се осврна и на статусот што го има Реал Мадрид во светскиот фудбал. Тој истакна дека работењето во различни земји во текот на претходните години му помогнало подобро да разбере како се перцепира мадридскиот клуб надвор од Шпанија.
„Реал Мадрид е одличен клуб поради сите трофеи што ги освои, но и поради своите принципи и начинот на кој пристапува кон спортот и општеството. Бев отсутен 13 години и во тој период подобро разбрав како луѓето надвор од Шпанија го гледаат Реал Мадрид“, објасни Мурињо.
Португалецот зборуваше и за факторите што ја обликуваа неговата тренерска кариера, нагласувајќи дека успехот претставува комбинација од различни околности и постојана подготовка за нови предизвици.
„Сè е комбинација од различни фактори. Роден сум со нешто посебно и секогаш се подготвував за следниот чекор. Работите изгледаа дека одат во вистинската насока. Иако секогаш има многу луѓе околу тренерот, тој на крајот е сам, а тоа не е лесно. Мораме да знаеме како да ги скриеме нашите слабости“, рече искусниот стручњак.
Мурињо добро ја започна новата епизода на клупата на кралскиот клуб. Реал Мадрид моментално е на второто место во Ла Лига со 30 бода, три помалку од лидерката Барселона.
Следниот предизвик за Мадрид ќе биде дуелот против Селта, кој е закажан за сабота, во рамките на 13-то коло од шпанското првенство.
Тимот бележи добри резултати и во Лигата на шампионите, каде што постигна максимален учинок по првите четири кола.


