Првото сезонско дерби меѓу МЗТ Скопје и Работнички, кое заврши со победа на „аеродромци“ од 74-60, доби и дисциплинска завршница. Кошаркарската федерација на Македонија изрече сериозни санкции по случувањата во „Јане Сандански“, а најтешко помина капитенот на Работнички, Виктор Ефремовски.
Ефремовски е казнет со 200.000 денари поради физичкиот напад врз плејмејкерот на МЗТ Скопје, Тадија Тадиќ, инцидент што се случил непосредно по завршувањето на натпреварот, во моментите кога кошаркарите на двата тима се поздравувале. Настанот бил забележан во извештајот на службените лица, по што следела дисциплинска постапка и санкција од КФМ.
Станува збор за една од највисоките парични казни изречени во македонската кошарка. Според објавените информации, повисока казна досега имал само поранешниот директор на МЗТ Скопје, Тони Грнчаров, кој беше санкциониран со 300.000 денари во периодот кога Перо Антиќ беше на чело на федерацијата.
Но, дисциплинската одлука не се однесува само на капитенот на Работнички. МЗТ Скопје ќе мора да плати 40.000 денари поради фрлање тврди предмети на теренот и неспортско навивање, додека Работнички е санкциониран со 10.000 денари за неспортско навивање.
Дополнително, санкции поради технички грешки заработиле и тренерите на двата тима, Мирковски и Реџа, кои според објавените информации ќе треба да платат по 3.200 денари.
Така, дербито кое на теренот заврши со убедлива победа на МЗТ Скопје, продолжи и по последниот звук на сирената, а дисциплинските одлуки донесени по натпреварот ја затворија приказната за инцидентите во првото овосезонско градско дерби.


