Ѕвездата на Минесота Тимбервулвс, Ентони Едвардс, е оптимист во врска со неговото закрепнување од операцијата на коленото на која беше подложен кон крајот на минатиот месец, но сè уште не знае кога ќе се врати на теренот во Националната кошаркарска асоцијација (НБА).
Дваесет и пет-годишниот бек страдаше од воспаление на десното колено, но играше во текот на регуларната сезона напролет пред да го повреди другото колено во првото коло од плејофот во април. Четирикратниот Ол-стар играч зеде два месеци пауза во текот на летото за повредата да заздрави без операција, но по почетокот на новата сезона стана јасно дека тоа нема да биде можно.
Првично се очекуваше Едвардс да отсуствува најмалку осум недели, но плановите се променија по операцијата и тој не знае кога ќе се врати на теренот.
„Тоа беше нешто што морав да го поправам за да можам да играм без болки во следните неколку години, но којзнае? Можеби за неколку години ќе морам да правам нешто друго, но се надевам дека нема. Мислам дека ќе бидам добро. Планирам да се вратам, но не знам кога. Само се обидувам да ја вратам силата во ногата. Мислам дека тоа е најтешката работа“, рече Американецот по тренингот на Минесота, цитиран од АП.
Во своите четири натпревари оваа кампања, Ентони Едвардс има просек од 33,3 поени, 4,8 скока и 3,5 асистенции. Ова е седма сезона во лигата за играчот избран со број 1 избор на драфтот во 2020 година, а досега неговиот просек во кариерата е 24,6 поени, 5,2 скока и 4,1 асистенција во 446 натпревари.


