Селекторот на македонската репрезентација до 16 години, Дејан Стојановски, по последниот натпревар на Европското првенство и поразот од Бугарија во мечот за 13. место, го оцени настапот на своите избраници, посочувајќи ги причините за денешното издание, но и потребата од сериозна работа во периодот што следува.
„Денеска не бевме спремни за борба, а направивме и многу тактички грешки. Не се држевме до планот за игра, во многу моменти бевме недисциплинирани, а тоа на ова ниво не смее да се случи. Повторно имавме многу грешки и не е добро вака да се презентираме“, вели Стојановски по поразот од 62:102 од нашиот источен сосед.
Сепак, селекторот смета дека целокупната слика од настапот на првенството е реална, особено ако се земат предвид ограничувањата со кои се соочуваше тимот.
„Мислам дека оваа слика е реална. Ние во групната фаза игравме на максимум. Имавме и лоши моменти, тоа е нормално, но немаме длабока клупа која може да ги компензира тие работи.“, додаде тој.
